聽了楊千嬅十年，但是聽畢這專輯，比《Meridian》更不濟。
從《狼來了》和《愛人》走來，到《最後的歌》以及《一千零一個》，楊千嬅都是那麼令我覺得她在唱出我的故事。手機中，還是華星和新藝寶的歌最多。老早已經對AMusic失望的時候，一隻《Wonder Miriam》真的有起來之勢，當我期待到最高點時，突然殺出《原來過得很快樂》，真是死心了。
容祖兒這年的《A Time For Us》和《很忙》斷截禾蟲拼拼湊湊的大碟疲態已現的時候，大家都認為楊千嬅或者謝安琪都可以簡簡單單plug首靚歌就打完這場女歌手大戰。豈料和AMusic最後一張大碟竟然不濟到如此地步。當年新藝寶的《Make Up》和金牌《Unlimited》都是跳槽佳作，豈料《原來過得很快樂》會打破紀錄，唉。
其實一看歌表，已經心知不妙：兩年前的倉底貨《All about love》竟然可以翻炒兩首。怎料不plug的《藍風箏》、《對木偶唱歌》和《孖公仔》竟然可以唱到咁濫情，咁唔似楊千嬅之餘，又唔係唱得好，你同我講係突破？即係楊千嬅唱stephy同twins既歌都係突破？你心中既楊千嬅唔係咁低level呀？我心中的楊千嬅唔係咁低囉唔該。
還有，《你幸褔嗎》真的「驚喜」無限，楊千嬅唱少女情懷已經在《Meridian》行不通的了，今次仲要扮粉紅心跳無知少女上身唱少女情歌，呢d歌交畀江若林唱都嫌大，大佬啊你唔好嚇我呢d資深fans啦，點解你既專長唔見晒，我d《再見二丁目》、《可惜我是水瓶座》去晒邊呀？你豐富的感情聲線，先係你最殺食既部分呀，唔該！
或者我同楊千嬅都年時已高，我唔大貪，只求楊千嬅大碟有《Make Up》的質素就得。楊千嬅，下一隻，如果你做得好的話，這三年的大碟，我會當作時運高見唔到。因為，我對你還有一點希望。
推介：《我在橋上看風景》、《麥芽糖》
